हेटौंडा भ्रमणमा आउनुभएका रामेछाप उद्योग वाणिज्य संघको टोलीसंग छलफल गरिएको छ । मकवानपुर उद्योग वाणिज्य संघका अध्यक्ष कृष्ण कुमार गुप्ताको सभापतित्वमा एक कार्यक्रम आयोजना गरी छलफल गरिएको हो । कार्यक्रममा अध्यक्ष कृष्ण कुमार गुप्ताले भ्रमण टोलीको नेतृत्व गर्नुभएका रामेछाप उद्योग वाणिज्य संघका अध्यक्ष नविन कुमार थापा मगरलगायतको आठ सदस्यीय टोलीलाई संघमा स्वागत गर्नुभएको थियो । साथै उहाले मकवानपुर उद्योग वाणिज्य संघको गतिविधिहरु बारे भ्रमण टोलीलाई जानकारी गराउनु भएको थियो ।
रामेछाप उद्योग वाणिज्य संघका अध्यक्ष नविन कुमार थापा मगरले कार्यक्रम आयोजना गरी आतिथ्यता दिएको प्रति धन्यवाद व्यक्त गर्नुभएको थियो ।
कार्यक्रममा मन्तव्य राख्नुहुदै संघका निवर्तमान अध्यक्ष तथा नेपाल उद्योग वाणिज्य महासंघका केन्द्रीय सदस्य कृष्ण कटुवालले संघ भवनमा रहेको पसल कवलहरु तथा पल्पसा सदनको आम्दानीले संघलाई सहज भएको र विगतमा स्थानीय तहहरुसंग आर्थिक साझेदारीका कामहरु भएपनि हाल नरहेको बताउनु भएको थियो ।
कार्यक्रममा भ्रमण टोली सदस्य होम प्रसाद पौडेल, मकवानपुर उद्योग वाणिज्य संघका कोषाध्यक्ष सन्तोष कुमार अर्याल र वरिष्ठ उपाध्यक्ष अनिल अग्रवालले मन्तव्य राख्नु भएको थियो ।
