मकवानपुर उद्योग वाणिज्य संघको नेतृत्वमा विभिन्न संघसंस्थाहरुको सहकार्यमा गठित कोभिड हेल्प डेस्क मकवानपुरले व्यवस्थापन गर्नेगरी पल्पसा सभागृह परिसरमा पल्पसा आइसोलेशन सेन्टर संचालनमा आएको छ । बुधबार एक औपचारिक कार्यक्रम गरी सेवाको शुरुवात गरिएको हो । मकवानपुर उद्योग वाणिज्य संघका अध्यक्ष तथा कोभिड हेल्प डेस्क मकवानपुरका संयोजक कृष्ण कटुवालको सभापतित्व र पूर्व गृहराज्यमन्त्री तथा बागमती प्रदेश सांसद ईन्द्र बानियाको प्रमुख आतिथ्यता, बागमती प्रदेश सांसदहरु प्रेम बहादुर पुलामी छिन्तु र मुनु सिग्देलको विशेष आतिथ्यतामा समुद्घाटन कार्यक्रम भएको हो । कार्यक्रममा राजनैतिक दलका प्रतिनिधिहरु, स्वास्थ्य क्ष्ँेत्रका प्रमुख तथा प्रतिनिधिहरुको उपस्थिति रहेको थियो । अफिनमा आवद्ध मकवानपुर सहकारी अस्पताल, चुरेहिल हस्पिटल, हेटौंडा सिटी हस्पिटल, मोडल हस्पिटल र सञ्चो हस्पिटलको विशेष सहयोगमा आइसोलेशन संचालन गरिएको हो ।
संक्रमितको कारण परिवार र समाजमा थप संक्रमण फैलिन नदिन र स्वास्थ्यकर्मीको प्रत्येक्ष निगरानीको लागि आइसोलेशन प्रभावकारी हुने भएकोले सचेत संक्रमितहरु आइसोलेशनमा रहनु उपयुक्त हुने गर्दछ । पल्पसा आइसोलेशनमा ३० वटा बेडको व्यवस्था गरिएको छ । पुरुष तर्फ २० वेड र महिला तर्फ १० बेडको व्यवस्था गरिएको छ । बुधबार नै एकजना कोभिड संक्रमित भर्ना हुनुभएको छ भने ४ जना संक्रमित भर्नाको हुनको लागि सम्पर्कमा आउनुभएको पल्पसा आइसोलेशन सेन्टरका संयोजक भुवनलाल श्रेष्ठले बताउनु भएको छ ।
बुधबार कोभिड हेल्प डेक्स मकवानपुरको सचिवालयबाट ५३ जना संक्रमितहरुलाई फोन सम्पर्कमार्फत उनीहरुको अवस्था बुझ्ने कार्य गरिएको छ । हेल्प डेस्कका स्वास्थ्यकर्मीहरुबाट फोन सम्पर्क गरी संक्रमितको अवस्था बुझ्ने, रायसुझाव दिने र समस्या भएमा हेल्प डेस्कमा सम्पर्क गर्न आग्रह गर्ने गरिएको छ ।
मंगलबार र बुधबार गरी ७ सिलिण्डर अक्सिजन हेल्प डेस्कबाट निःशुल्क वितरण गरिएको छ । ५ वटा कैलाश गाउ“पालिकामा पठाइएको छ भने हेटौंडा–४ मा र हेटौंडा–६ मा एक–एक थान सिलिण्डर अक्सिजन पठाइएको छ ।