पत्रकार सम्मेलनमा संघका अध्यक्ष कृष्ण कुमार गुप्ताले महोत्सवको हरहिसाव बारे निम्नानुसार जानकारी गराउनु हुंदै पत्रकारहरुबाट राखिएको जिज्ञासा उपर जवाफ दिनु भएको थियो ।

उद्योगी/व्यवसायीहरुको पेशगत हीतको लागि मकवानपुर जिल्लालाई कार्यक्षेत्र बनाई आफ्ना गतिविधिहरु संचालन गरिरहेको यस संघ वि. सं. २०१८ सालदेखि क्रियाशील र वि.सं. २०२३ सालमा विधिवत दर्ता भई निरन्तर संचालनमा रहेको छ । यस संघ जिल्लामा रोजगारी, कृषि, सूचना प्रविधि, पर्यटन, उद्योग, व्यापार तथा जिल्लाको आर्थिक विकासमा टेवा पु-याउने उद्देश्य रहेको गैरनाफामूलक परोपकारी संस्थाको रुपमा रहीआएको छ । प्रारम्भमा हेटौंडा व्यापार संघ नामाकरण भएपनि वि.सं. २०२५ सालमा नाम परिवर्तित भई मकवानपुर उद्योग वाणिज्य संघ रहन गएको यस संघले जिल्लामा रहेका सदस्य तथा गैरसदस्य उद्योगी/व्यवसायीहरुको सुरक्षाको लागि आवश्यक पैरवीहरु गर्दै आएको छ ।

मकवानपुर जिल्लाको व्यापार व्यवसाय विस्तार तथा प्रवद्र्धन गर्न नियमितरुपमा सूचनामूलक कार्यक्रम, तालिम, गोष्ठी आदी कार्यक्रमहरु संचालन तथा समन्वय गर्दै आएको छ । साथसाथै जिल्लामा भएका औद्योगिक हड्ताल, मजदुर मालिक विवाद जस्ता समस्याहरु मध्यस्थतामार्फत निराकरण तथा सामाजिक हितका लागि उल्लेखनीय क्रियाकलापहरु सम्पादन गर्दै आएको छ ।
सोही क्रममा व्यवसायको विस्तार, सम्भावित ग्राहकहरुसंग छलफल, नयाँ वस्तु एवम् सेवाहरुको प्रवद्र्धन, नयां उद्यमीहरुलाई प्रोत्साहित गर्ने र समग्रमा उद्योग तथा व्यापारमार्फत यस क्षेत्रकै आर्थिक, सामाजिक तथा पर्यटकीय विकासमा मद्दत पु-याउने उद्देश्यका साथ यस संघद्वारा विभिन्न समयमा मेला, प्रदर्शनी तथा व्यापार प्रवद्र्धनका कृयाकलापहरु गर्दै आएको छ । वि. सं. २०४२ सालमा तत्कालीन अध्यक्ष नारायणप्रसाद शर्माको नेतृत्वमा सम्भवत नेपालकै पहिलो औद्योगिक व्यापार मेला २०४२ सम्पन्न गरिएको थियो । सोपश्चात मेलालाई निरन्तरता प्रदान गर्ने क्रममा बि.सं. २०४३, २०५३, २०५५, २०५६ सालमा आयोजना गरिएको थियो भने बि.सं. २०६६ मा मध्यमाञ्चल औद्योगिक व्यापार मेला तथा २०६८, २०७०, २०७२ र २०७५ सालमा राष्ट्रिय औद्योगिक व्यापार मेला सफलतापूर्वक सम्पन्न भएका थिए ।
यस पटक पनि बागमती प्रदेशका विभिन्न मन्त्रालय र मकवानपुर जिल्लाका स्थानीय तहहरुको सहयोगमा वि.सं. २०७९ माघ ११ गतेदेखि २३ गतेसम्म हेटौंडा–१०, टिसिएन चौरमा “१०औं राष्ट्रिय औद्योगिक व्यापार महोत्सव २०७९” आयोजना गरी सफलतापूर्वक सम्पन्न भएको यहांहरुमा अवगत नै छ ।
महोत्सवलाई आकर्षणयुक्त बनाउन बाल उद्यानदेखि दैनिक राष्ट्रिय तथा स्थानीय कलाकारहरुको सांगितिक कला प्रस्तुति रहेको थियो । महोत्सवमा देशभरबाट कृषि, उद्योग, व्यवसाय, निर्माण, सूचना प्रविधि, पर्यटन, अटो, होटल, शैक्षिक, सरकारी, गैरसरकारी संघसंस्था, महिला उद्यमीका उत्पादन तथा सेवाहरुका स्टलहरु रहेको विदितै छ । महोत्सवमा व्यवसायी, उद्योगी, उपभोक्ता, सरकारी निकाय, संघ/संस्था, अनुसन्धानकर्ता र आमनागरिकसमेत एकै ठाउँमा जमघट भई प्रतिक्रिया, सुझाव आदानप्रदान हुंदा समग्रमा उद्यमशीलतामा टेवा पुगेको हाम्रो विश्वास रहेको छ । महोत्सवको प्रवद्र्धनको लागि यहांहरुकै सहयोगमा स्थानीय तथा राष्ट्रियस्तरका पत्रपत्रिका, रेडियो, टेलिभिजन तथा अनलाइन मिडियासमेतबाट प्रचारप्रसार गरिएको अवगत नै छ ।

महोत्सवले संघको आयमा केही योगदान पुग्नुका साथसाथै राष्ट्रव्यापी रुपमा मकवानपुर जिल्लालाई पहिचान दिने र जिल्लाको गरिमा बढ्ने हाम्रो बुझाई रहेकाले हामीले महोत्सवलाई आफ्नो नियमित कार्यसूचीमा राख्दै मेला/महोत्सव आयोजना गर्दै आएका छौं । जसमा सरकारी तथा गैरसरकारी संघसंस्था, स्थानीय मकवानपुर जिल्लावासी, दर्शक, प्रदर्शक, प्रायोजक, पत्रकार, सुरक्षा निकायलगायत सम्पूर्णको साथ तथा सहयोगको प्रतिफल हाम्रो १०औं राष्ट्रिय औद्योगिक व्यापार महोत्सव २०७९ सफलरुपमा सम्पन्न भएको छ । तसर्थ हामी सबैलाई एकमुष्ट रुपमा धन्यवाद ज्ञापन गर्दछौ ।
संघले आयोजना गरेका महोत्सवको आयबाट संस्थागत खर्च व्यवस्थापनपश्चात गर्ने अर्को महत्वपूर्ण खर्च क्षेत्र भनेको सामाजिक परोपकारी कार्य नै हो । तसर्थ संघले गरेको आम्दानी संघमै सिमित नभई समाजमा वितरण हुनेभएकाले यसलाई थप सकारात्मक रुपमा लिन सकिने हाम्रो बुझाई रहेको छ ।
संघले यस पटक महोत्सवबाट टिडियस, भ्याट, आय करलगायतबाट १९ लाख रकम राज्यलाई राजश्व बुझाउन सफल भएको छ । महोत्सवमा केही स्टलहरु निःशुल्क, केही न्यून शुल्क र केही स्टलहरु सहुलियत दरमा हामीले उपलब्ध गराएका थियौं । महोत्सवबाट कुल रु. १,२१,४९,५७६।– (अक्षरेपि रु. एक करोड एक्काइस लाख उनानचास हजार पांच सय छैहत्तर मात्र) आम्दानी भएको थियो । खर्च तर्फ कुल रु. १,१३,९८,७७६।– (अक्षरेपि रु. एक करोड तेह्र लाख अन्ठानब्बे हजार सात सय छैहत्तर मात्र) भएको छ । फलस्वरुप रु. ७,५०,८००।– (अक्षरेपि रु. सात लाख पचास हजार आठ सय मात्र) बचत आम्दानी भएको छ । साथै प्रायोजकहरुबाट रु. ३२,८०,०००।– (अक्षरेपि रु. बत्तिस लाख अस्सी हजार मात्र) जिन्सीसमेत गरी प्राप्त हुने क्रममा रहेको छ ।