मकवानपुर उद्योग वाणिज्य संघको नेतृत्व र विभिन्न सामाजिक संघसंस्थाहरुको सहकार्यमा गठन गरिएको कोभिड हेल्प डेस्क मकवानपुरले हेटौंडा–२ स्थित पल्पसा सभागृह परिसरमा संचालन गरिरहेको पल्पसा आइसोलेशन सेन्टरलाई सुखसमृद्धि बचत तथा ऋण सहकारी संस्थाबाट सहयोग प्राप्त भएको छ । सुखसमृद्धि बचत तथा ऋण सहकारी संस्थाबाट खाद्यान्न सहयोग प्राप्त भएको हो । सुखसमृद्धि बचत तथा ऋण सहकारी संस्थाका अध्यक्ष सुशिला पाण्डेले कोभिड हेल्प डेस्क मकवानपुरका संयोजक कृष्ण कटुवाललाई सोमबार खाद्य सामग्री हस्तान्तरण गर्नुभएको छ । सहयोग हस्तान्तरण कार्यक्रममा सहकारीका अध्यक्ष सुशिला पाण्डे, हेल्प डेस्कका सदस्य सरोज खनाल, सचिवालय संयोजक कृष्ण कुमार गुप्ता र संयोजक कृष्ण कटुवालले मन्तव्य राख्नुभएको थियो । हेल्प डेस्कका संयोजक कृष्ण कटुवालले सहयोगको लागि सुखसमृद्धि बचत तथा ऋण सहकारी संस्थाको टिमलाई धन्यवाद ज्ञापन गर्नुभएको थियो ।
कोभिड हेल्प डेस्क मकवानपुरलाई पूर्व गृहराज्यमन्त्री, नेपाली कांग्रेस मकवानपुरका सभापति तथा बागमती प्रदेशका प्रतिपक्षि दलका नेता सांसद माननीय ईन्द्र बहादुर बानियाबाट हेल्प डेस्कलाई सहयोग प्राप्त भएको छ । उहांले रु. ६०,०००।– नगद सहयोग गर्नुभएको हो । उहांले आइसोलेशनमा स्वास्थ्यलाभ लिइरहनुभएका कोभिडका बिरामीहरुसंग पनि अन्तक्र्रिया गर्नुभएको थियो ।
हेल्प डेस्कलाई सोमबार राष्ट्रिय प्रजातन्त्र पार्टीबाट आर्थिक सहयोग प्राप्त भएको छ । राप्रपाका जिल्ला अध्यक्ष गुरु प्रसाद सापकोटाबाट हेल्प डेस्कका संयोजक कृष्ण कटुवाललाई नगद रु. १७,०००।– हस्तान्तरण गर्नुभएको थियो । कार्यक्रममा राप्रपा मकवानपुरका नेता कार्यकर्ता र हेल्प डेस्कका पदाधिकारीहरुको उपस्थिति रहेको थियो ।
होटल व्यवसायी भागिरथ शर्माबाट हेल्प डेस्कलाई सहयोग प्राप्त भएको छ । उहांले सोमबार पल्पसा आइसोलेशन सेन्टरलाई १० किलो कुखुराको मासु सहयोग गर्नुभएको हो ।
पल्पसा आइसोलेशन सेन्टरलाई व्यवस्थितरुपमा संचालन गर्न मउवासंघबाट एकजना पदाधिकारीको संयोजनमा दुईजना कार्यसमिति सदस्यहरु दैनिकरुपमा स्वयमसेवी हिसावले खट्ने व्यवस्था गरिएको छ । सोमबार संघका सहकोषाध्यक्ष राधिका सामरी पाण्डेको संयोजन रहेको थियो ।
